У апошнія гады ультраапрацаваныя прадукты звязваюць з мноствам захворванняў — ад атлусцення да раку і дэменцыі. Дыпламаваны дыетолаг з Каліфорніі Джэсіка Уілсан вырашыла правесці эксперымент і праверыць, ці такія кепскія насамрэч гэтыя прадукты. Пра вынікі яна расказала часопісу Time.
Ультраапрацаваныя прадукты — гэта ежа, вырабленая ў прамысловых умовах (на фабрыках ці ў фастфуд-установах) з рафінаваных і максімальна ачышчаных ад дамешкаў інгрэдыентаў з даданнем эмульгатараў, загушчальнікаў і штучных араматызатараў. Часта такія прадукты маюць даўжэйшы тэрмін захоўвання.
Эксперымент Уілсан заключаўся ў тым, што яна месяц ела такую ежу, каб паглядзець, як змена рацыёну ўплывае на яе цела і розум.
Яна выявіла дзіўную рэч: такі падыход да харчавання даў ёй больш энергіі, дапамог даўжэй заставацца сытай і «адчуваць сябе нашмат лепш». Яна кажа, што ў яе знізілася трывожнасць, а яшчэ ёй не трэба было столькі кавы, як раней, каб пражыць дзень, і яна адчувала сябе больш матываванай.
Уілсан харчавалася ў асноўным толькі апрацаванымі прадуктамі розных відаў, ад гатовых папярэдне запакаваных і замарожаных страваў да ежы на вынас і прадуктаў, якія змяшчаюць больш за пяць інгрэдыентаў.
Напрыклад, яна ела тофу, аўсянае малако і мюслі без злакаў, якія могуць утрымліваць некалькі інгрэдыентаў, але пры гэтым усё роўна могуць лічыцца карыснымі. Таксама ў яе меню былі хот-догі і піцы, чыпсы і цукеркі. Яны складалі 80% яе рацыёну. Астатнія 20% — гэта гародніна, садавіна, яйкі, арэхі і насенне.
— Як можа ўся гэтая катэгорыя прадуктаў быць нечым, чаго нам варта пазбягаць? — заявіла Уілсан.
Яна хацела даказаць таксама, што само вызначэнне ультраапрацаваных прадуктаў недакладнае.
Напрыклад, шматзерневы хлеб можна лічыць глыбока апрацаваным, хоць ён — добрая крыніца клятчаткі, вітамінаў і іншых пажыўных рэчываў, якія большасць дыетолагаў рэкамендуе ўключаць у рацыён.
Такім чынам, не ўсе ультраапрацаваныя прадукты харчавання аднолькавыя, таму могуць па-рознаму ўплываць на здароўе.
Падводзячы вынікі дыеты, спецыялістка адзначыла, што на ланцужку, які яна абвязвала вакол таліі, выгульваючы сабаку цягам месяца, з’явіўся «прыкметны зазор», што дазваляе дапусціць, што яна нават схуднела.
Гэта, на думку Уілсан, можа быць звязана з тым, што яна не спажывала дастаткова калорый да пачатку эксперыменту, а ўжыванне ультраапрацаваных прадуктаў дазволіла ёй быць больш энергічнай.
Дакладных звестак пра тое, як ультраапрацаваная ежа ўплывае на здароўе, няма, пісала Руская служба Бі-бі-сі. Аднак нядаўняе даследаванне, апублікаванае ў British Medical Journal і заснаванае на выбарцы з 9,9 млн чалавек па ўсім свеце, звязала яе з павышанай рызыкай смерці ад сардэчна-сасудзістых захворванняў (такіх як інфаркт і інсульт), атлусценнем, цукровым дыябетам другога тыпу, праблемамі са сном, трывожнымі станамі і дэпрэсіяй.
Пры гэтым даследаванне не змагло даказаць, што менавіта апрацоўка прадуктаў харчавання — прычынай захворванняў. Магчыма, рэч у тым, што большасць з іх ўтрымлівае шмат тлушчу, цукру і солі. Гэта даўно вядомыя прычыны набору вагі, дыябету другога тыпу, хваробаў сэрца і некаторых відаў раку.
Чытайце таксама
