На 2023 год беларусам абяцалі тройчы павысіць працоўныя пенсіі. Пра гэта заяўляў раней Аляксандр Лукашэнка. Гэтыя выплаты сёлета паднялі ўжо двойчы — у траўні і верасні. Чытач «Люстэрка» як фізасоба спытаў у Мінпрацы, ці будзе сёлета трэцяе павышэнне працоўных пенсій.
— Не, не будзе (павышэння працоўных пенсій. — Заўв. рэд.). У снежні памер пенсій будзе ў тым самым памеры, што і ў лістападзе, — паведамілі ў Мінпрацы.
Нагадаем, у канцы снежня мінулага года Аляксандр Лукашэнка заяўляў, што ў 2023-м працоўныя пенсіі збіраюцца павысіць тройчы, як і ў 2022-м.
Тады на нарадзе па пытаннях зарплаты і грашовага забяспечання бюджэтнікаў Аляксандр Лукашэнка казаў пра тое, што неабходна грунтавацца на магчымасцях эканомікі, але асобна згадаў пенсіянераў. «Пенсіянераў падтрымалі. У наступным годзе разы тры мы таксама іх падтрымаем», — сказаў у снежні 2022 года Аляксандр Лукашэнка.
Сёлета працоўныя пенсіі павышалі з 1 траўня і 1 верасня.
У 2024 годзе ў сярэднім пенсіі па ўзросце плануюць павысіць на 15%, паведаміла раней кіраўніца Мінпрацы і сацабароны Ірына Касцевіч.
Чытайце таксама
