Ігар Сяргеенка ідзе ў дэпутаты Палаты прадстаўнікоў ад Віцебскай вобласці: ён балатуецца ў Паставах. Як і астатнія кандыдаты, ён падаў звесткі пра даходы і маёмасць. Гэтую інфармацыю «Люстэрка» знайшло ў нумары газеты «Витебские вести» ад 2 лютага 2024 года. Расказваем, колькі зарабіў топавы чыноўнік.
Кандыдаты ў дэпутаты даюць справаздачу за даходы 2022 года (падатковыя дэкларацыі за мінулы год будуць падавацца ў сакавіку).
У дэкларацыі пра даходы і маёмасць Ігара Сяргеенкі за 2022 год запісаная кватэра ў Мінску плошчай 101,6 кв. м, а таксама даход у памеры 172 503 рублёў. З іх 44 553 рублі — ад продажу зямельнага ўчастка.
Згодна з артыкулам 17 закона «Пра барацьбу з карупцыяй», дзяржслужбоўцы не маюць права працаваць на іншых аплатных пасадах (выключэнне — навуковая, педагагічная, культурная, творчая і медыцынская дзейнасць). А значыць, калі ад названай сумы адняць даход ад продажу ўчастка, то рэшта — і ёсць гадавая зарплата чыноўніка. У 2022 годзе яна была роўная 127 950 рублям, або 10 663 рублям за месяц.
Для параўнання, сярэдні налічаны заробак у Беларусі за 2022 год склаў 1631 рубель, а пасля выліку падаткаў на рукі атрымлівалася блізу 1403 рублёў. Выходзіць, што ў 2022 годзе топавы чыноўнік зарабляў у 7,6 разу больш, чым сярэдні беларус.
Кіраўнік адміністрацыі балатуецца на выбарчым участку ў Паставах. У дакументах па вылучэнні гаворыцца, што ён беспартыйны і вылучаецца «ад працоўных калектываў». Канкурэнцыю Сяргеенку на Пастаўскай выбарчай акрузе складуць два кандыдаты: кіраўнік сялянска-фермерскай гаспадаркі «АНДРЕЙЧиК» Дзмітрый Андрэйчык (вылучаецца ад ЛДПБ) і першы сакратар браслаўскага філіяла БРСМ Ірына Мурашка (сябра партыі «Белая Русь»).
Сяргеенка займае пасаду кіраўніка Адміністрацыі Лукашэнкі з 2019 года. Да гэтага ён працаваў першым намеснікам старшыні КДБ. У выпадку абрання дэпутатам Сяргеенка мусіць пакінуць адміністрацыю.
