Урад апублікаваў пералік «сродкаў размяшчэння» юрыдычных асобаў і індывідуальных прадпрымальнікаў, якія абавязаныя паведамляць у міліцыю пра замежнікаў, якія ў іх пасяліліся. Адпаведная пастанова апублікаваная на Нацыянальным прававым інтэрнэт-партале.
«Да сродкаў размяшчэння — памяшканняў, якія выкарыстоўваюцца юрыдычнымі асобамі і індывідуальнымі прадпрымальнікамі для аказання паслуг па размяшчэнні, адносяцца нумары, пакоі і іншыя памяшканні, размешчаныя ў гатэлях, акватэлях, апарт-гатэлях, матэлях, спа-гатэлях, хостэлах, кемпінгах, аздараўленчых арганізацыях, санаторна-курортных арганізацыях, а таксама дамы паляўнічага і рыбалова, дамы паляўнічага (рыбака), шале, бунгала», — гаворыцца ў пастанове.
Дакумент прыняты на падставе часткі першай артыкула 43−1 Закона «Пра прававое становішча замежных грамадзян і асобаў без грамадзянства ў Рэспубліцы Беларусь».
Нагадаем, згодна з гэтым дакументам, падчас засялення замежнікаў уладальнік памяшкання мусіць паведаміць пра іх у МУС, прычым на гэта адводзіцца не больш за тры гадзіны пасля засялення пастаяльцаў. Паведамляць пра замежнікаў трэба будзе праз інфармацыйныя рэсурсы МУС, адзіны партал электронных паслуг. За парушэнне гэтага патрабавання прадугледжаны штраф да 20 базавых велічынь (800 рублёў).
Адзначым, што гэтае патрабаванне датычыць таксама фізічных асобаў, якія здаюць у арэнду жыллё.