Чыноўнікі абмеркавалі ў панядзелак, 22 ліпеня, сітуацыю з імпартнымі таварамі ў Беларусі. Так, Аляксандр Лукашэнка раскрытыкаваў урад «за пачварную працу на ўнутраным рынку». На яго думку, «трэба забяспечыць разумную абарону гэтага рынку». «Мы павінныя абараняць разумна ўласны рынак», — сказаў Аляксандр Лукашэнка.
Пры гэтым абсалютную абарону ўнутранага рынку ад імпарту Аляксандр Лукашэнка не лічыць магчымым варыянтам, паколькі ў адказ іншыя краіны закрыюць свае рынкі для айчыннай прадукцыі. Пра гэта паведамляе прэс-служба палітыка.
«Такі наш лёс, што ў нас вырабляецца ўсё тое, што ў свеце вырабляюць у вялікай колькасці. Таму проста так абараняць свой рынак, зачыніцца на мяжы і нікога не пусціць не атрымаецца. Трэба дзейнічаць разумна. Для гэтага ў нас ёсць урад, каб дапамагаў прамысловым прадпрыемствам працаваць», — адзначыў Аляксандр Лукашэнка.
Палітык заявіў, што арыентаваны на тое, каб больш актыўна адстойваць інтарэсы Беларусі ў рамках тых дамоўленасцяў, якія маюцца з іншымі краінамі, у тым ліку з Расеяй. «Мы часам гэта пускаем на самацёк», — заўважыў Аляксандр Лукашэнка.
Нагадаем, раней, 17 чэрвеня, Аляксандр Лукашэнка заклапаціўся адмоўным сальда ў знешнім гандлі — імпарт тавараў перавышае пастаўкі нашых у іншыя краіны. Гэтае пытанне ён абмяркоўваў з прэм’ер-міністрам Раманам Галоўчанкам.
Чыноўнікі не першы год змагаюцца з імпартам, але маюць з гэтым цяжкасці. Тым часам Беларусь усё больш збліжаецца з Расіяй па знешнім гандлі.
Нагадаем, у 2023 годзе цяперашні першы намеснік міністра эканомікі Андрэй Картун (тады ён быў проста намеснікам кіраўніка гэтага ведамства) заявіў, што «рынак ужо дастаткова насыціўся імпартам, тэмпы росту імпарту будуць скарачацца, будзе выраўноўвацца сальда знешняга гандлю». Чыноўнік таксама казаў, што ўрад пакуль не бачыць рызык ад гэтага перакосу ў знешнім гандлі. Ён таксама звяртаў увагу на адну з прычын паскоранага павелічэння імпарту — рост спажывецкага рынку. «Тут у нас і ўнутраны рынак засумаваў па пэўных таварах», — адзначыў раней Андрэй Картун.
Чытайце таксама
