Пасля таго як у панядзелак на палігоне ў літоўскім Пабрадэ з балота дасталі затанулую гусенічную браняваную рамонтна-эвакуацыйную машыну (БРЭМ) ЗША, пракуратура пачала дасудовае расследаванне па факце гібелі вайскоўцаў, якія знаходзіліся на яе борце, піша LRT.
«Распачатае дасудовае расследаванне для высвятлення прычын смерці», — заявіла ў панядзелак у Сейме генеральны пракурор Літвы Ніда Грускене.
Паводле яе, на месца здарэння выехаў пракурор, а расследаванне вядзе Генеральная пракуратура.
Кіраўніца Мінабароны Давіле Шакалене казала, што ў расследаванні бяруць удзел амерыканскія следчыя.
«Гэтыя вучэнні арганізоўваліся арміяй ЗША. Менавіта камандуючы аперацыяй нясе адказнасць за планаванне і дзеянні, якія выконваліся падчас вучэнняў. Уся інфармацыя будзе перададзеная следчым. <…> Як менавіта адбыўся гэты інцыдэнт — гэта ўжо наступны этап расследавання, бо ў нас пакуль няма інфармацыі пра вайскоўцаў», — заявіла Шакалене.
Інфармацыя пра тое, што адбылося, належыць краіне, грамадзянамі якой з’яўляюцца загінулыя вайскоўцы. Менавіта яна павінная паведаміць усе звесткі, у тым ліку сваякам, адзначаў прадстаўнік літоўскага войска Гінтаўтас Цюніс.
Нагадаем, 25 сакавіка на вайсковым палігоне ў Пабрадэ падчас вучэнняў знікла гусенічная бронемашына M88 Hercules з чатырма амерыканскімі вайскоўцамі. На наступны дзень стала вядома, што машына затанула ў балоце. Яна знаходзілася на глыбіні чатырох метраў, а зверху ляжаў двухметровы пласт глею. Вядома імя аднаго з вайскоўцаў, якія знаходзіліся ў машыне, — гэта Дантэ Гога Тайтана з вострава Гуам.
Машыну ўдалося дастаць ранняй раніцай 31 сакавіка.