Колькасць кожнага атрада народнага апалчэння ў Беларусі не будзе перавышаць ста чалавек, колькасць атрадаў і месца іх фарміравання будуць вызначацца мясцовымі ўладамі. Пра гэта гаворыцца ў палажэнні пра парадак фарміравання і забяспечання народнага апалчэння, апублікаваным на Нацыянальным прававым інтэрнэт-партале.
«Грунтуючыся на прынцыпах кіравальнасці, аптымальная колькасць атрада, як правіла, не мусіць перавышаць 100 чалавек, групы народнага апалчэння — 20 чалавек», — гаворыцца ў дакуменце.
Камплектаваць атрады народнага апалчэння будуць на добраахвотнай аснове з ліку асобаў, у тым ліку вайсковаабавязаных, здольных па стане здароўя браць удзел у выкананні задач па забяспечанні ваеннага становішча на тэрыторыі асобнай адміністрацыйна-тэрытарыяльнай (тэрытарыяльнай) адзінкі. Падчас адбору прымаецца пад увагу стаўленне кандыдата да палітыкі, якую праводзіць дзяржава, гатоўнасць яго да ўдзелу ва ўзброенай абароне краіны, узровень яго вайсковай падрыхтоўкі.
Пасля залічэння ў атрад народнага апалчэння кожнаму добраахвотніку выдаецца пасведчанне, зброя і боепрыпасы да яе.
Асноўныя спосабы выканання задач атрадамі народнага апалчэння — патруляванне і выстаўленне пастоў на вуліцах, участках мясцовасці і аб’ектах для перадухілення і спынення правапарушэнняў.
Нагадаем, 17 ліпеня Аляксандр Лукашэнка падпісаў закон пра народнае апалчэнне. Але першы эксперымент па стварэнні народнага апалчэння прайшоў восенню 2022 года на базе Лабжанскага сельскага савета Клімавіцкага раёна Магілёўскай вобласці.